વિશ્વ આદિવાસી દિવસ નિમિત્તે સંકલ્પ એજ્યુકેશન ટ્રસ્ટની સેવાકીય પહેલ

ત્રણ ગામોના 350થી વધુ બાળકોને રૂ. 1 લાખની શૈક્ષણિક સામગ્રીનું વિતરણ

ગણદેવી/બીલીમોરા, તા. 9 ઓગસ્ટ, 2026: વિશ્વ આદિવાસી દિવસ નિમિત્તે સંકલ્પ એજ્યુકેશન ટ્રસ્ટ દ્વારા ગણદેવી અને બીલીમોરા નજીકના ત્રણ ગામોમાં સેવાકીય કાર્યક્રમનું આયોજન કરવામાં આવ્યું હતું. તાજેતરના પૂરથી અસરગ્રસ્ત પરિવારો અને જરૂરિયાતમંદ બાળકોને મદદરૂપ થવાના હેતુથી યોજાયેલા આ કાર્યક્રમમાં 350થી વધુ બાળકોને અંદાજે રૂ. 1 લાખની શૈક્ષણિક સામગ્રીનું વિતરણ કરવામાં આવ્યું હતું.

સંકલ્પ એજ્યુકેશન ટ્રસ્ટ દ્વારા વાઘરેચ, ક્લમઠા નાયકીવાડ ફળિયું અને ધમડાચા ગામોમાં બાળકોને નોટબુક, સ્કૂલબેગ, બોલપેન સહિતની શૈક્ષણિક કીટનું વિતરણ કરવામાં આવ્યું હતું. આ ઉપરાંત જરૂરિયાતમંદ કેટલાક પૂરપીડિત પરિવારોને બ્લેન્કેટનું પણ વિતરણ કરવામાં આવ્યું હતું.

વિશ્વ આદિવાસી દિવસના અવસરને સેવાકીય પ્રવૃત્તિ સાથે જોડીને બાળકોના શિક્ષણને પ્રોત્સાહન આપવાનો આ પ્રયાસ કરવામાં આવ્યો હતો. પૂર જેવી કુદરતી આફતના સમયમાં બાળકો અને અસરગ્રસ્ત પરિવારોને સહાય મળી રહે તે માટે ટ્રસ્ટ તથા સહયોગીઓ દ્વારા કરવામાં આવેલી આ પહેલને ગ્રામજનો દ્વારા આવકારવામાં આવી હતી.

આ સેવાકીય કાર્યમાં મિનેષભાઈ પટેલ (શિક્ષક), કૌશિકભાઈ પટેલ (સામાજિક કાર્યકર), બીપીનભાઈ પટેલ (શિક્ષક), હેમંતભાઈ પટેલ (શિક્ષક), અશ્વિનભાઈ નાયકા તથા ઓરકેસ્ટ્રા પાર્ટી અને તેમની ટીમ, હાર્દિકભાઈ પટેલ (સામાજિક કાર્યકર), મનહરભાઈ પટેલ (શિક્ષક), રમેશભાઈ પટેલ (શિક્ષક) તથા તેમના મિત્રો, સંદીપભાઈ પટેલ (શિક્ષક), વિકીભાઈ ટેલર (શિક્ષક), નિલેશભાઈ પટેલ (શિક્ષક, વલવાડા) સહિત ગામના આગેવાન મિત્રો અને સેવાભાવી લોકો જોડાયા હતા.

આ પ્રસંગે આયોજકો દ્વારા જણાવ્યું હતું કે, “વિશ્વ આદિવાસી દિવસ નિમિત્તે બાળકો અને પૂરપીડિત પરિવારોને મદદરૂપ બનવાનો અમને અવસર મળ્યો તે અમારા માટે ગૌરવની વાત છે. બાળકોના શિક્ષણમાં નાની પણ ઉપયોગી મદદ તેમના ભવિષ્ય માટે મોટું પ્રોત્સાહન બની શકે છે.”

સંકલ્પ એજ્યુકેશન ટ્રસ્ટની આ સેવાકીય પહેલથી ત્રણ ગામોના 350થી વધુ બાળકોને શૈક્ષણિક સામગ્રી મળી હતી, જ્યારે જરૂરિયાતમંદ પૂરપીડિત પરિવારોને પણ રાહતરૂપ સહાય પ્રાપ્ત થઈ હતી.

“સેવા, શિક્ષણ અને માનવતાના સંકલ્પ સાથે આગળ વધતી આ પહેલ સમાજ માટે પ્રેરણારૂપ બની છે.”